Сая ургацын баярын амралтаар Харангын тоглолт үзэх гээд хүлээж суулаа. Уг нь 7 цагт эхлэнэ гэж билетэн дээрээ байсан юм. Даанч үзэгчид цугларч өгөхгүй бүтэн хоёр цаг хүлээж 9 болж байхад арай гэж нэг юм эхлээд.

Үзэгчид цөөхөн байсан болохоор тэгсэн үү яасан Харангыхан маань ч нилээн урамгүй тоглолтоо хийх шиг болсон. Санасныг бодоход тоглолт санаанд хүрсэнгүй ээ.

Миний л мэдэх ихэнх хүмүүс Харангын Лхагвааг энд ирж тоглоно гэдэгт итгээгүйгээс болсон уу эсвэл зар муу тараагдсан уу маш цөөхөн хүмүүс үзэхээр ирсэн байлаа. Зарим нь бүүр хэрвээ Лхагвааг энд ирээд тоглоод явах юм бол Монгол улсын хуулинд итгэхийн арга алга гэж шогширч байсаныг нуух юун.

Хүн дайрсан хэрэгт татагдаж байгаа хүн батлан даалтаар гарсан байлаа ч гэсэн улсын хил даваад аялан тоглолт хийгээд явна гэдэгт олон хүн итгээгүй бололтой.

За энэ яахав.Тоглолт эхлэхийг хүлээгээд сууж байх хооронд нэг пацаан бид хэдийг элгээр явуулахаа алдлаа.

Бүхэл бүтэн хоёр цаг хүлээх хооронд эргэн тойрныхоо улстай ганц хоёр гурав дөрвөн үг сольж суутал бид нарын ард сууж байсан хэдэн залуус ярианд оролцож нутаг усаа санасан хүмүүс баахан хууч хөөрөв.

Тэд бараг жилийн өмнө гэрээгээр энд ирж ажиллаж байгаа юм байна. Анх нэг том барилгын компанид 40 гаруй Монгол  гэрээний ажилчид бүгдээрээ нэг дор ажиллахаар ирсэн гэнэ. Бараг л ирсэн өдрөөсөө тойрч сууж тамхиа татаад, дарга даамалтайгаа хэрэлдээд, бид хонины мах иддэг, махтай хоол өгөхгүй бол энэ ажлыг чинь хийж чадахгүй гээд ажил хаялт заралсан юм байхаа. Орой болгон л тэр дөчөөд залуус архи уун, хоорондоо хэрэлдэж хажуу хавийхаа солонгосуудыг барьж авч балбан ихэнх нь нутаг буцан сэргэлэн нэг нь зугтаж чаджээ. Тэр явдлаас болоод барилгын салбарт нэмж захиалга өгөх байсан бүх компаниуд Гадаадад ажиллах хүч гаргах төвтэй гэрээгээ цуцалсан тухай дам яриа сонсож байсан юм байна. Уг нь барилга цас бороотой өдөр амарна, үнэлгээ сайтай, цалин өндөртэй хурдан мөнгө хураах гэсэн хүмүүст боломжийн ажил юм шиг байгаам.

Бид нарын яриа аажмаар Солонгосын хөгжил цэцэглэлт рүү шилжиж энэ тэрийг ярьж байтал нэг жижигхээн биетэй хорь орчим насны хүү "Өнөөдөр анх удаа Сөүл орж ирлээ, гоё юмаа, зааа сөүлын метронд суугаад үзчихлээ, очоод Улаанбаатарыхаа метронд сууж үзнээ" гэж хэлээд бид хэдийг бараг хөшөөхөө шахлаа. Тоглоод байгаа юм байх гэж бодсон үгүй ээ.

"20 наслахдаа Улаанбаатарт хоёрхон удаа очиж үзсэн юм. Метронд нь сууж амжаагүй ээ" гээд үнэн сэтгэлээсээ яриад... хэхэ